സലാല:ചെങ്കടലിലെ പ്രതിസന്ധി മൂലം സലാല തുറമുഖത്ത് ചരക്ക് വരവില്‍ കുറവ്. ഈ വർഷം ആദ്യ പകുതി കഴിഞ്ഞപ്പോള്‍ സലാല തുറമുഖത്തേക്കുള്ള കണ്ടെയ്നറിന്‍റെ വരവില്‍ 16 ശതമാനത്തിന്‍റെ കുറവാണുണ്ടായത്.
ചെങ്കടലിലുണ്ടായ പ്രതിസന്ധി മൂലം ചരക്ക് കപ്പലുകള്‍ വഴിമാറി യാത്രചെയ്തതാണ് പ്രധാന കാരണം.
ഈ വർഷം ജൂണ്‍ വരെ 1.679 ദശലക്ഷം 20 അടി സമാന അളവിലുള്ള കണ്ടെയ്നറുകളാണ് സലാല തുറമുഖത്തെത്തിയത്. കഴിഞ്ഞ വർഷം ഇതേ കാലയളവില്‍ 1.999 ദശലക്ഷമായിരുന്നു. എന്നാല്‍, കെണ്ടയ്നർ ഷിപ്പിങ് മേഖലയില്‍ തുറമുഖം വെല്ലുവിളി നേരിടുന്നുണ്ടെങ്കിലും ഈ വർഷം ആദ്യ പകുതിയില്‍ കാർഗോ സർവിസ് നാലു ശതമാനം വർധിച്ചു.
ജിപ്സം കയറ്റുമതിയിലാണ് വലിയ വർധനയുണ്ടായത്. ഈ വർഷം ആദ്യ പകുതിയില്‍ 11.655 ദശലക്ഷം ടണ്‍ കാർഗോയാണ് തുറമുഖം വഴി കടന്നു പോയത്. കഴിഞ്ഞ വർഷം ഇതേ കാലയളവില്‍ 11.215 ദശലക്ഷം ടണ്ണായിരുന്നു കാർഗോ സർവിസ്.
ചെങ്കടലില്‍ നടക്കുന്ന സംഘർഷാവസ്ഥ തുടരുന്നത് ആഗോള കപ്പല്‍ പാതയെ പ്രതികൂലമായി ബാധിക്കും. പ്രധാനമായും ഏഷ്യക്കും യൂറോപിനും ഇടയിലുള്ള കപ്പല്‍ സർവിസിനെയാണ് ബാധിക്കുന്നതെന്ന് സലാല തുറമുഖം പ്രതിനിധികള്‍ പറഞ്ഞു.
കഴിഞ്ഞ വർഷം അവസാന പാദത്തില്‍ ആരംഭിച്ച കപ്പലുകള്‍ക്ക് നേരെയുള്ള ആക്രമണം കപ്പല്‍ക്കടത്ത് ചെലവ് വർധിപ്പിക്കാൻ കാരണമായിട്ടുണ്ട്. അന്തിമായി ഈ വില വർധന ഉപഭോക്താക്കളിലേക്കാണെത്തുന്നത്. ചെങ്കടല്‍ പ്രതിസന്ധി പല തുറമുഖങ്ങളുടെയും പ്രവർത്തനത്തെ ബാധിച്ചിട്ടുണ്ട്.
എന്നാല്‍, സലാല തുറമുഖം ഇതില്‍ നിന്ന് ഒഴിവായെന്നും അടുത്ത പകുതിയില്‍ ചരക്ക് ഗതാഗതം വർധിക്കാനാനുള്ള സാധ്യതയയുണ്ടെന്നും അധികൃതർ പറഞ്ഞു. ഈ വർഷം മൊത്തം അഞ്ച് മുതല്‍ ആറ് വരെ ശതമാനം വർധന ഉണ്ടാവാനാണ് സാധ്യത. മധ്യ പൗരസ്ഥ്യ മേഖലയിലെ പ്രതിസന്ധിക്ക് പരിഹാരം കണ്ടില്ലെങ്കില്‍ ഈ വർഷം മൂന്നാം പാദത്തിലും ചരക്ക് ഗതാഗതം കുറയും.
ഇതോടെ സലാല തുറമുഖത്തിലെ ലാഭത്തിലും കുറവുണ്ടാക്കും. ഈ വർഷം ആദ്യ പകുതിയില്‍ കമ്ബനിയുടെ ലാഭം 1.570 ദശലക്ഷം റിയാലാണ്. കഴിഞ്ഞ വർഷം ഇതേ കാലയുളവില്‍ 2.363 ദശലക്ഷം റിയാലായിരുന്നു ലാഭം. കടല്‍ പ്രതിസന്ധി കാരണം തുറമുഖത്തില്‍ നിന്നുള്ള മൊത്തം വരുമാനത്തിലും രണ്ട് ശതമാനം കുറവുണ്ടായി.
STORY HIGHLIGHTS:Due to the crisis in the Red Sea, there is a decrease in cargo arrivals at the port of Salalah
