ഒമാൻ:പുതുവര്‍ഷത്തില്‍ വിജയത്തോടെ തുടങ്ങി ഒമാൻ ഫുട്ബാള്‍ ടീം. ഖത്തറില്‍ നടക്കുന്ന ഏഷ്യൻ കപ്പ് ഫുട്ബാള്‍ ടൂര്‍ണമെന്‍റിന് മുന്നോടിയായുള്ള അവസാന സൗഹൃദ മത്സരത്തില്‍ ആതിഥേയരായ യു.എ.ഇയെ ഏകപക്ഷീയമായ ഒരു ഗോളിനാണ് പരാജയപ്പെടുത്തിയത്.
അബൂദബിയിലെ അല്‍നഹ്യാൻ സ്റ്റേഡിയത്തില്‍ നടന്ന മത്സരത്തില്‍ മധ്യനിര താരം അബ്ദുല്ല ഫവാസാണ് റെഡ്വാരിയേഴ്സിനുവേണ്ടി വലകുലുക്കിയത്. കളിയുടെ ആദ്യമിനിറ്റുകളില്‍ ഇരുടീമുകളുടെയും മുന്നേറ്റമായിരുന്നു കണ്ടിരുന്നത്. ഇതിനിടെയാണ് യു.എ.ഇയെ ഞെട്ടിച്ച്‌ അഞ്ചാം മിനിറ്റില്‍ ഒമാൻ ഗോള്‍ നേടിയത്. ഇതോടെ ഉണര്‍ന്നുകളിച്ച യു.എ.ഇ ആക്രമണം ശക്തമാക്കി.
സമനിലക്കായുള്ള ആതിഥേയരുടെ ശ്രമങ്ങള്‍ പലപ്പോഴും പരുക്കൻ കളിയിലേക്കു നീങ്ങുകയും ചെയ്തു. ഒമാൻ കൂടുതല്‍ ഗോള്‍ നേടാനുള്ള ശ്രമത്തോടൊപ്പം പ്രതിരോധവും ശക്തമാക്കിയത് യു.എ.ഇക്ക് ആദ്യ പകുതിയില്‍ വിലങ്ങുതടിയായി. രണ്ടാം പകുതിയല്‍ തിരിച്ചടിക്കാനുള്ള നിരവധി അവസരങ്ങള്‍ യു.എ.ഇക്ക് കിട്ടിയിരുന്നുവെങ്കിലും റെഡ്വാരിയേഴ്സിന്‍റെ പ്രതിരോധത്തില്‍ തട്ടി മുനയൊടിഞ്ഞുപോകുകയായിരുന്നു.
ആദ്യ മത്സരത്തില്‍ ചൈനക്കെതിരെയും ഒമാൻ വിജയം നേടിയിരുന്നു.
STORY HIGHLIGHTS:Oman football team started the new year with a win.
